以前想學琴，家長大多數睇小朋友係咪有興趣先會學。呢個年代要「贏在起跑線」，家長會報左學琴先，然後再睇小朋友有冇興趣。
如果家長係有心比小朋友長遠學琴的話，唔同年齡層/階段上有唔同嘅事項要注意。
1）4歲或前的話，家長可以試下報playgroup/唱遊班比小朋友試下。呢啲班大多以遊玩、好奇心為主，家長可以作第一步觀察。正式上鋼琴班時，就會以技藝為主。
小朋友唔知音樂係咩⋯/試過有小朋友連琴都未見過⋯要佢即時有興趣彈係不設實際。
2）小朋友有興趣學，但連續幾個月連一首歌都彈唔到/甩得好嚴重，就要快啲轉老師。好多家長轉過黎前都誤信「大個啲就會得嫁啦」既說法，上完堂先知：「原來好多嘢都無學過/教得太差/教錯哂⋯」浪費左時間金錢不特只，仲要重新執再教過。
3）「學學下失去興趣」大部分都係一段時期遇到困難挫折，又未能係學琴中找回樂趣。呢個情況唔只小朋友，成人學生亦一樣。如果要強迫短時間內達成目標+不停強迫練習，興趣會加快流失。所以（家長要）理解+適當參與及放手+適當練習量係好重要。
4）如果小朋友係第二胎，佢地好多時係跟姐姐/哥哥步伐而學。姐/哥表現出眾，與自己形成強烈對比時，亦會有「唔知彈琴為乜」既心態。第二個古靈精怪、唔聽教仲要駁嘴既較多數所以教法同第一胎會完全唔同。但亦因為性格出眾既原因，有良好基礎打底下，女仔小五小六開始（男仔可能要遲少少）會明顯地比第一胎彈得好，但過程真係要時間及耐心。
5）學過琴有一定級數+時期既家長，會比較清楚點解訓練好小朋友有學琴需要既相關能力，及了解小朋友有無興趣下先開始，有啲更會安排7-9歲先開始學初級。正正因為無「起跑線」既包伏+家長知點樣培育下，小朋友既學習能力、效率及興趣係最高及持久。
老師既教法當然會影響到小朋友對學琴既興趣，但相比上學術班，學琴初段需要家庭嘅支持+ 支援多好多。單靠老師就會形成肯上堂但唔肯練琴既情況。
有時上堂佢地會突然好感性話：「都係得你先明我。明明我咁努力練父母成日話彈得唔好，唔識欣賞音樂但又要我學琴」
屋企多點讚賞佢地對練琴既付出～真係無壞嫁～
Bình luận